ਪ੍ਰਿਥਵੀ ਨੇ ਪਲੇਠੇ ਟੈਸਟ ਮੈਚ ਵਿੱਚ ਰਿਕਾਰਡਾਂ ਦੀ ਝੜੀ ਲਾਈ


ਰਾਜਕੋਟ - ਸਲਾਮੀ ਬੱਲੇਬਾਜ਼ ਪ੍ਰਿਥਵੀ ਸ਼ਾਅ (134) ਦੇ 18 ਸਾਲ ਦੀ ਉਮਰ ਵਿੱਚ ਰਿਕਾਰਡਤੋੜ ਇਤਿਹਾਸਕ ਸੈਂਕੜੇ ਦੀ ਬਦੌਲਤ ਭਾਰਤ ਨੇ ਵੈਸਟ ਇੰਡੀਜ਼ ਖ਼ਿਲਾਫ਼ ਪਹਿਲੇ ਕ੍ਰਿਕਟ ਟੈਸਟ ਦੇ ਪਹਿਲੇ ਦਿਨ ਅੱਜ ਚਾਰ ਵਿਕਟਾਂ ’ਤੇ 364 ਦੌੜਾਂ ਦਾ ਮਜ਼ਬੂਤ ਸਕੋਰ ਬਣਾ ਲਿਆ। ਸ਼ਾਅ ਅਤੇ ਚੇਤੇਸ਼ਵਰ ਪੁਜਾਰਾ (86 ਦੌੜਾਂ) ਨੇ ਦੂਜੀ ਵਿਕਟ ਲਈ 206 ਦੌੜਾਂ ਦੀ ਬਿਹਤਰੀਨ ਸਾਂਝੇਦਾਰੀ ਕੀਤੀ। ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫ਼ੈਸਲਾ ਕੀਤਾ ਅਤੇ ਪ੍ਰਿਥਵੀ ਨੂੰ ਬੱਲੇਬਾਜ਼ੀ ਸੌਂਪੀ। ਪਹਿਲੇ ਟੈਸਟ ਦੇ ਪਹਿਲੇ ਦਿਨ ਮੁੰਬਈ ਦੇ 18 ਸਾਲ ਦੇ ਪ੍ਰਿਥਵੀ ਨੇ ਇਸ ਦਾ ਪੂਰਾ ਫ਼ਾਇਦਾ ਉਠਾਉਂਦਿਆਂ ਸੈਂਕੜਾ ਮਾਰ ਕੇ ਰਿਕਾਰਡਾਂ ਦੀ ਝੜੀ ਲਾ ਦਿੱਤੀ। ਉਸ ਨੇ 154 ਗੇਂਦਾਂ ’ਤੇ 134 ਦੌੜਾਂ ਦੀ ਬਿਹਤਰੀਨ ਪਾਰੀ ਵਿੱਚ 19 ਚੌਕੇ ਮਾਰੇ।
ਪੁਜਾਰਾ ਨੇ 130 ਗੇਂਦਾਂ ਵਿੱਚ 14 ਚੌਕਿਆਂ ਦੀ ਮਦਦ ਨਾਲ 86 ਦੌੜਾਂ ਅਤੇ ਉਪ ਕਪਤਾਨ ਅਜਿੰਕਿਆ ਰਹਾਣੇ ਨੇ 92 ਗੇਂਦਾਂ ਵਿੱਚ ਪੰਜ ਚੌਕਿਆਂ ਨਾਲ 41 ਦੌੜਾਂ ਬਣਾਈਆਂ। ਕਪਤਾਨ ਵਿਰਾਟ ਕੋਹਲੀ ਪਹਿਲੇ ਦਿਨ ਦੀ ਖੇਡ ਖ਼ਤਮ ਹੋਣ ਤੱਕ 137 ਗੇਂਦਾਂ ਵਿੱਚ ਚਾਰ ਚੌਕਿਆਂ ਦੀ ਮਦਦ ਨਾਲ 72 ਦੌੜਾਂ ਅਤੇ ਵਿਕਟਕੀਪਰ ਰਿਸ਼ਭ ਪੰਤ 17 ਦੌੜਾਂ ਬਣਾ ਕੇ ਕ੍ਰੀਜ਼ ’ਤੇ ਡਟੇ ਹੋਏ ਸਨ।
ਭਾਰਤ ਨੇ ਹਾਲਾਂਕਿ ਖ਼ਰਾਬ ਸ਼ੁਰੂਆਤ ਕੀਤੀ ਅਤੇ ਸਲਾਮੀ ਬੱਲੇਬਾਜ਼ ਲੋਕੇਸ਼ ਰਾਹੁਲ ਨੂੰ ਪਹਿਲੇ ਹੀ ਓਵਰ ਵਿੱਚ ਛੇਵੀਂ ਹੀ ਗੇਂਦ ’ਤੇ ਗੁਆ ਲਿਆ। ਪਿਛਲੀਆਂ ਚਾਰ ਪਾਰੀਆਂ ਵਿੱਚ ਰਾਹੁਲ ਦੂਜੀ ਵਾਰੀ ਅਤੇ ਓਵਰਆਲ ਪੰਜਵੀਂ ਵਾਰ ਖਾਤਾ ਖੋਲ੍ਹੇ ਬਿਨਾਂ ਆਊਟ ਹੋਇਆ।
ਲੰਚ ਤੋਂ ਬਾਅਦ ਨੌਜਵਾਨ ਬੱਲੇਬਾਜ਼ ਸ਼ਾਅ ਨੇ ਆਪਣਾ ਸੈਂਕੜਾ ਪੂਰਾ ਕਰਕੇ ਇਤਿਹਾਸ ਸਿਰਜਿਆ। ਇਸ ਦੇ ਨਾਲ ਹੀ ਸ਼ਾਅ ਆਪਣੇ ਪਲੇਠੇ ਮੈਚ ਵਿੱਚ ਸੈਂਕੜਾ ਮਾਰਨ ਵਾਲਾ 15ਵਾਂ ਭਾਰਤੀ ਬੱਲੇਬਾਜ਼ ਬਣ ਗਿਆ ਹੈ, ਪਰ ਉਸ ਨੇ 18 ਸਾਲ 329 ਦਿਨ ਵਿੱਚ ਇਹ ਉਪਲਬਧੀ ਹਾਸਲ ਕੀਤੀ, ਜੋ ਕਿ ਭਾਰਤੀ ਰਿਕਾਰਡ ਹੈ। ਇਹੀ ਨਹੀਂ ਉਹ ਸਚਿਨ ਤੇਂਦੁਲਕਰ (17 ਸਾਲ 112 ਦਿਨ) ਮਗਰੋਂ ਟੈਸਟ ਮੈਚਾਂ ਵਿੱਚ ਸੈਂਕੜਾ ਪੂਰਾ ਕਰਨ ਵਾਲਾ ਸਭ ਤੋਂ ਨੌਜਵਾਨ ਭਾਰਤੀ ਬੱਲੇਬਾਜ਼ ਵੀ ਬਣ ਗਿਆ ਹੈ। ਸ਼ਾਅ ਆਪਣੇ ਪਲੇਠੇ ਮੈਚ ਵਿੱਚ ਸੈਂਕੜਾ ਮਾਰਨ ਵਾਲੇ ਸਭ ਤੋਂ ਛੋਟੀ ਉਮਰ ਦੇ ਬੱਲੇਬਾਜ਼ਾਂ ਦੀ ਸੂਚੀ ਵਿੱਚ ਚੌਥੇ ਨੰਬਰ ’ਤੇ ਹੈ। ਬੰਗਲਾਦੇਸ਼ ਦੇ ਮੁਹੰਮਦ ਅਸ਼ਰਫੁਲ ਅਤੇ ਜ਼ਿੰਬਾਬਵੇ ਦੇ ਹੈਮਿਲਟਨ ਮਾਸਕਾਦਜ਼ਾ ਨੇ 18 ਸਾਲ ਪੂਰਾ ਹੋਣ ਤੋਂ ਪਹਿਲਾਂ ਇਹ ਕਾਰਨਾਮਾ ਕੀਤਾ ਸੀ, ਜਦਕਿ ਪਾਕਿਸਤਾਨ ਦੇ ਸਲੀਮ ਮਲਿਕ ਦੀ ਉਮਰ ਪਲੇਠਾ ਸੈਂਕੜਾ ਮਾਰਨ ਵੇਲੇ ਸ਼ਾਅ ਦੀ ਉਮਰ ਤੋਂ ਛੇ ਦਿਨ ਘੱਟ ਸੀ।
ਮੁੰਬਈ ਦੇ ਇਸ ਨੌਜਵਾਨ ਬੱਲੇਬਾਜ਼ ਨੇ ਪਾਰੀ ਦੀ ਸ਼ੁਰੂਆਤ ਕੀਤੀ। ਸਭ ਤੋਂ ਘੱਟ ਉਮਰ ਵਿੱਚ ਪਲੇਠੀ ਪਾਰੀ ਦਾ ਆਗਾਜ਼ ਕਰਨ ਦਾ ਰਿਕਾਰਡ ਵਿਜੈ ਮੇਹਰਾ ਦੇ ਨਾਮ ਹੈ, ਜਿਸ ਨੇ 1955 ਵਿੱਚ ਨਿਊਜ਼ੀਲੈਂਡ ਖ਼ਿਲਾਫ਼ ਇਹ ਮਾਣ ਹਾਸਲ ਕੀਤਾ ਸੀ। ਉਸ ਸਮੇਂ ਉਹ 17 ਸਾਲ 265 ਦਿਨ ਦਾ ਸੀ। ਸ਼ਾਅ ਨੇ ਭਾਰਤ ਦੇ ਬੁਧੀ ਕੁੰਦਰਨ ਦਾ ਰਿਕਾਰਡ ਤੋੜਿਆ, ਜਿਸ ਨੇ ਆਸਟਰੇਲੀਆ ਖ਼ਿਲਾਫ਼ 1959-60 ਵਿੱਚ 20 ਸਾਲ 113 ਦਿਨ ਦੀ ਉਮਰ ਵਿੱਚ ਪਲੇਠੇ ਟੈਸਟ ਮੈਚ ਦੀ ਪਹਿਲੀ ਗੇਂਦ ਖੇਡੀ ਸੀ। ਸ਼ਾਅ ਨੇ 99 ਗੇਂਦਾਂ ’ਤੇ ਆਪਣਾ ਸੈਂਕੜਾ ਪੂਰਾ ਕੀਤਾ। ਇਸ ਤਰ੍ਹਾਂ ਉਹ ਸਭ ਤੋਂ ਤੇਜ਼ ਸੈਂਕੜਾ ਮਾਰਨ ਵਾਲਾ ਤੀਜਾ ਬੱਲੇਬਾਜ਼ ਬਣ ਗਿਆ ਹੈ। ਭਾਰਤ ਦੇ ਹੀ ਸ਼ਿਖਰ ਧਵਨ ਨੇ ਆਸਟਰੇਲੀਆ ਖ਼ਿਲਾਫ਼ 2013 ਦੌਰਾਨ ਮੁਹਾਲੀ ਵਿੱਚ 85 ਗੇਂਦਾਂ ’ਤੇ ਅਤੇ ਵੈਸਟ ਇੰਡੀਜ਼ ਦੇ ਡਵੈਨ ਸਮਿੱਥ ਨੇ 2004 ਵਿੱਚ ਦੱਖਣੀ ਅਫਰੀਕਾ ਖ਼ਿਲਾਫ਼ ਕੈਪਟਾਊਨ ਵਿੱਚ 93 ਗੇਂਦਾਂ ’ਤੇ ਸੈਂਕੜਾ ਪੂਰਾ ਕੀਤਾ ਸੀ। ਸ਼ਾਅ ਨੇ ਪਹਿਲੀ ਸ਼੍ਰੇਣੀ ਅਤੇ ਟੈਸਟ ਕ੍ਰਿਕਟ ਵਿਚ ਪਲੇਠੇ ਮੈਚਾਂ ਵਿੱਚ ਸੈਂਕੜਾ ਮਾਰਨ ਵਾਲਾ ਦੁਨੀਆਂ ਦਾ ਤੀਜਾ ਬੱਲੇਬਾਜ਼ ਬਣ ਗਿਆ ਹੈ। ਉਸ ਤੋਂ ਪਹਿਲਾਂ ਭਾਰਤ ਦੇ ਗੁੰਡੱਪਾ ਵਿਸ਼ਵਨਾਥ ਅਤੇ ਆਸਟਰੇਲੀਆ ਦੇ ਡਰਕ ਵੇਲਹਮ ਨੇ ਇਹ ਉਪਲਬਧੀ ਹਾਸਲ ਕੀਤੀ ਹੈ। ਵੀਰੇਂਦਰ ਸਹਿਵਾਗ ਨੇ ਵੀ ਆਪਣੇ ਪਲਠੇ ਟੈਸਟ ਅਤੇ ਪਹਿਲੀ ਸ਼੍ਰੇਣੀ ਦੇ ਮੈਚ ਵਿੱਚ ਆਪਣੀ ਸੈਂਕੜਾ ਪਾਰੀ ਖੇਡੀ ਸੀ, ਪਰ ਉਹ ਪਹਿਲੀ ਸ਼੍ਰੇਣੀ ਵਿੱਚ ਉਸ ਦਾ ਦੂਜਾ ਮੈਚ ਸੀ। ਸ਼ਾਅ ਪਲੇਠੇ ਟੈਸਟ ਕ੍ਰਿਕਟ ਵਿੱਚ 50 ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਪਹਿਲਾ ਨੌਜਵਾਨ ਭਾਰਤੀ ਬੱਲੇਬਾਜ਼ ਹੈ। ਭਾਰਤ ਵੱਲੋਂ ਉਸ ਤੋਂ ਪਹਿਲਾਂ ਇਹ ਰਿਕਾਰਡ ਅੱਬਾਸ ਅਲੀ ਬੇਗ ਦੇ ਨਾਮ ਸੀ, ਜਿਸ ਨੇ 1959 ਵਿੱਚ ਇੰਗਲੈਂਡ ਖ਼ਿਲਾਫ਼ ਓਲਡ ਟ੍ਰੈਫਰਡ ਵਿੱਚ 20 ਸਾਲ 126 ਦਿਨ ਵਿੱਚ ਪਲੇਠਾ ਮੈਚ ਵਿੱਚ ਨੀਮ ਸੈਂਕੜਾ ਮਾਰਿਆ ਸੀ।
ਸਕੋਰ ਬੋਰਡ
ਪਹਿਲਾ ਦਿਨ/ ਭਾਰਤ ਦੀ ਪਹਿਲੀ ਪਾਰੀ
ਪ੍ਰਿਥਵੀ ਸ਼ਾਅ ਕੈਚ ਐਂਡ ਗੇਂਦ ਬਿਸ਼ੂ 134
ਲੋਕੇਸ਼ ਰਾਹੁਲ ਐਲਬੀਡਬਲਯੂ ਗੇਂਦ ਗੈਬਰੀਅਲ 0
ਚੇ. ਪੁਜਾਰਾ ਕੈਚ ਡੋਅਰਿਚ ਗੇਂਦ ਸ਼ੇਰਮਨ ਲੂਈਸ 86
ਵਿਰਾਟ ਕੋਹਲੀ (ਕਪਤਾਨ) -ਖੇਡ ਰਿਹਾ 72
ਅਜਿੰਕਿਆ ਰਹਾਣੇ ਕੈਚ ਡੋਅਰਿਚ ਗੇਂਦ ਰੋਸਤਨ 41
ਰਿਸ਼ਭ ਪੰਤ (ਵਿਕਟ ਕੀਪਰ) – ਖੇਡ ਰਿਹਾ 17
ਵਾਧੂ 14
ਕੁੱਲ 89 ਓਵਰਾਂ ਵਿੱਚ ਚਾਰ ਵਿਕਟਾਂ ’ਤੇ 364 ਦੌਡ਼ਾਂ

 

Latest News
Magazine Archive